SHILLONG :Kumba ka paw, dei tang ka Nationalist Congress Party (NCP) kaba la leit iakynduh ia ka 13th Finance Commission ha ka jingwan ba dang shen jong ka sha Shillong ban iakynduh ia ki bor jong ka Sorkar Meghalaya ban ia kren ia syllok halor ki kam ba iadei bad ka jingai bhah tyngka ia ka Meghalaya na ka pla tyngka jong ka ri India katkum ki kyndon ba la buh da ka Konstitushon jong ka ri India.
Ym tip na kano ka daw ba dei tang ka seng NCP sngewmat kaba la leit ia kynduh ia ka 13th Finance Commission ha ka 27 tarik u Iaiong, 2009.
Na ka liang jong ka United Democratic Party (UDP), katkum ka jingiathuh jong u General Secretary jong ka, u Bah A Lyngdoh, “ka khlem ioh jingtip shaphang kane ka jingwan jong ka Finance Commission.”
Haba u Dongmusa u la kylli ia u Dr R C Laloo, uwei na ki nongkitkam jong ka seng Congress, “la ka seng Congress ka la leit iakynduh ne em ia ka 13th Finance Commission?”
Ka jubab jong u Dr Laloo ka long: “em ngi na ka liang ka seng Congress ngi khlem leit namar ngim shym ioh jingtip.”
Ban tip ia ka daw balei la khot tang ia ka NCP katba ia kiwei pat ki seng ym shym la khot, u Dongmusa u la kren da ka phone ia u Chief Secretary, u Ranjan Chatterjee, ban kylli “balei la khot tang ia ka NCP katba ia kiwei ki seng pat ym shym la khot ban wan iakynduh ia ka 13th Finance Commis-sion?”
U Chief Secretary u la ong “sha baroh ki political party la phah shithi ban wan iakynduh ia ka 13th Finance Commission.”
Lada ka jingong u Chief Secretary ka long kaba shisha, ka paw shai ba ki party kum ka UDP, ka seng Congress bad kiwei kiwei ki party ki dei ki party khlein lathang jwat la bam party.
Katkum ka press release ba la pynmih u Dr Jemino Mawthoh, u President jong ka NCP Shillong City District Committee, na ka liang jong kane ka seng, leit ma u (Dr Jemino Mawthoh) bad u State Working President jong ka seng, u Dr L Cajee, ban iakyndoh ia ka Finance Commission, ha ka Sngi Nyngkong, ka 27 tarik u Iaiong, 2009.
Ki jingdawa jong ka NCP, ha ka jingiakyndoh jong ba bad ka 13th Finance Commission, ki kynthup ruh ia ka jingdonkam jong ki bor ka sorkar kmie ban pynbiang tyngka shuh ia ka Meghalaya na ka bynta ka roi ka par.
Ka NCP ka la dawa ruh ba ia ka tyngka kaba wan na ka Consolidated Fund of India, kat kum ki kyndon ba la buh da ka Konstitushon jong ka ri India, dei ban pynkiew sha ka 35-36 per cent.
Na ka liang ka NCP ka la dawa ruh na ka Commission ban pynbiang tyngka ia ka Sorkar Meghalaya khnang ba kan lah ban pynkiew tulop katkum ki jingai jingmut jong ka IVth Pay Commission.
Ha kane ka jingleit iakynduh jong ka bad ka Finance Commission, ka NCP ka la dawa jingiarap kaba kham bun ia ki nongrep jong ka jylla, kiba long baroh 70 per cent na ki nongshong shnong jong ka jylla, khnang ba kin lah ban pynkiew ia ka jingpynmih mar rep jong ki bad kin lah ruh ban kham im.
Namar ha ki jaka sor ruh dang dei ban ioh bun ki jingdonkam ban iarap kyntiew ia ki briew ha ka liang ka ioh ka kot, ka jingkoit jingkhiah bad ruh ba kan don ka jingkhuid jingsuba hapoh shnong poh thaw bad ruh ban pynlait ia ki jaka sor na ka jingkhap ngiah, ka NCP ka la dawa jingiarap ba kham biang na ka bynta ki jaka sor.
Wat na ka liang ki jingiarap bad kam pynlait im ba ai ia kito kiba shem jynjar bad shem lanot kum haba pynjulor ki bor mariang bad kiwei kiwei ki jingjulor, ka NCP ka la kyntu ia ka Finance Commission ban pynthikna ba ki bor sorkar kiba pyniaid ia kine ki kam ki ioh ia ka tyngka babiang khnang ba kin lah ban pyndep hok ia ki kam ai jingiarap ba la mang na ki ha ki por ba don ki jingjulor ba kum kine.
Ka NCP ka la pynpaw ruh kumno ki lad ai jingiarap bad jingsumar ia kiba pang ba shitom ha Meghalaya, khamtam sha ki thain nong-kyndong, ka dang duna bha. Namar kane ka daw, ka la dawa na ka Finance Commission ban ai ka tyngka babiang na ka bynta kine ki jait jingiarap. .