Khubor Dongmusa
SHILLONG : Ka Megha-laya Non - Conventional and Rural Energy Develop-ment Agency, 5 Mer, Upper Shillong, ka la pynlong ka jingdie bad jingpyni nam ia ki tiar ai jingshai bad ki tiar pynthnam um ki ban pyn-donkam beit da ka bording kjat sngi kaba ym donkam lut ei ei, bad lait ban pyn-donkam ia ka bording ilektrik lane umphniang sharak. Kine ki tiar ki kynthup ia ki lanten kjat sngi, ban pyndonkam ha ka jaka ki bulb, ilektrik ha ki iing, ki sharak tbeh jingshai ha ki surok shnong, ki jing pynthnam umdih, um sum bad shet jingshet, ha kaba ki nongpyndonkam ia kine ki tiar kin lait ban pynlut pisa ha kaba siew ia ki bai ilektrik lane ki bai umphniang sharak, kiba ju pynlut ym duna ia ka T.12,000 ha ka shi snem bad ioh ban kynshew noh ia kane ka pisa.
Ia kane ka jingdie bad pyni nam ia kine ki tiar la pynlong ha All Saint Hall, Shillong ha ka 5 bad 6 tarik , kata myn hynnin ka Sngi Balang. Kiba la ioh ban thied ia kine ki tiar ba ka sorkar ka la die shiteng dor, dei kiba la wanrah ia ki dur thep vote ilekshon ba la tip kum ki dur EPIC . Don ruh kiba la wanrah da ki bill ilektrik.
Ki nongkyndong kiba ju lynniar ia ki jing duh lynter ka bording ilektrik bad ki jingkyrduh um- phniang sharak, kin sa ioh ban kynshew kyrpang noh kumba 12,000 tyngka shi snem haba kin sa ioh ban pyndonkam noh da ki lanten kjat sngi kaba kim donkam siew ei ei bad kin sa lah ban kham im pahuh ha iing ha sem, ong ki arngut ki stad wad bniah na ri China kiba don mynta ha ka jylla Gujarat ban sdang ia kane ka projek kaba thymmai.
Ki arngut ki nong-hikai, u Professor Govindsa-my Agoramoorthy na ka skul bah Tajen University bad ka Dr. Mina Hsu na ka skul bah National Sun Yatsen University na ka nongbah Taiwan na China, ki dang pynlong ka jingpeit kaba sani bha kumno ki trei kam ki 100 tylli ki lanten kjat sngi ba la tip kum ki Solar Lantern ba ki la ai nongmuna ha kawei ka Sengbhalang kaba la pyntrei kam ha ki 25 tylli ki shnong nong kyndong ha ka distrik Dahod jong ka jylla Gujarat la 3 snem lynter mynta, naduh u snem 2004 haduh u snem 2007.
Ha ka jingbuddien kaba sani bha ia man la ki rympei iing kiba la pyndon-kam ia kine ki lanten kjat sngi ban ai jingshai ha ki iing ki sem ha ki por ba la kem iong rein bad dum mynmiet la shem ba ka jinglut ha kaba siew ia ki bai ilektrik ne bai umphniang sharak ka la duna shibun eh naduh ba ki la pyndonkam da ki lanten kjat sngi. Kawei pa kawei ka rympei, ki la ioh ban kynshew ia ka pisa kaba kot da T.5.531 bad T.12,556 ha ka shi snem ia kaba ki ju pynlut ha kaba siew ia ka bill bai ding ilektrik bad ki bai umphniang sharak ban shet jingshet. Naduh ba ki la pyn donkam da ka lanten bording kjat sngi, kim donkam shuh ia ki bording ilektrik ne ban khuslai ia ki jingkyrduh umphniang sharak.
Kine ki lanten bording kjat sngi ki la long kawei pat ka lad kaba pynsuk bad pyllait ia ki iing baduk ban kham kunai ia ki pisa ba ki ioh kamai da kaba ki trei shitom haman la ka sngi, khlem da donkam shuh ban pynlut ha kaba siew bai ding ilektrik ne ban thied umphniang sharak.
Ki stad wad bniah ki la shem ruh ba ki lanten kjat sngi ki iarap eh ia ka koit ka khiah jong ki khun ki kti bad ia ki longkmie, ba kim donkam ban khuslai ia ka jinglip ding ilektrik kaba khah khah.
Kine ki lanten ki neh ka bording haduh 6 kynta, kaba mut ba kine ki la ioh ban pyndep lut ia ki kam iing baroh bad ki khun ruh ki ioh ia ka por kaba pahuh bha ba kin khreh kot.
Ha kiwei pat ki por mynstep bad mynsngi ba biang ka jingshai na ka sngi, ki longkmie ki ioh pahuh ka por ban pyndep ia bun jait ki kam iing bad pyndap bording na ki kjat sngi ha ka lanten.