Khubor Dongmusa
NONGPOH : Ka Meghala-ya Veterinary Service Association (MVSA), distrik Ri Bhoi Unit, ka la ai jingsumar bad dawai ei dang shen ia ki hajar ki jingri jong ki paidbah nongshong shnong na ki kylleng ki shnong ka thain Umsning, ha ka phyllaw jong ka Zonal Food Mill, Umsning.
Ia kane ka prokram la pyniaid da u Chairman ka MVSA u Dr. R. Kharkongor uba long ruh u District Animal Husbandry and Veterinary Officer, Nongpoh, kum shi bynta ban rakhe ha ryngkat ka pyrthei shi tyllup ia ka sngi ba kyrpang jong ki jingri, ia kaba la tip kum ka World Veterinary Day.
U Block Develop-ment Officer (BDO) ka Community and Rural Development (C &RD), Umsning u bah P. Khonglah u la plie ia kane ka jingrakhe kum u Kongsan, bad kyntu ruh ia ki nongri jingri ba kin ai ia ka jingiatreilang bad ki doktor da kaba kin wan ban iathuh ha ki doktor ia kino kino ki jingeh lane ki jingpang kiba ktah ia ki jingri, khnang ba kin ioh ia ka jingjop. Ka kam ri jingri ka long kawei na ki lad kaba ai kam ia bun ngut ki briew bad kaba kyntiew sted ia ka ioh ka kot. Ki nongri jingri ki ioh shibun ki jingmyntoi na kaba ki jingri ki pynmih, namar wat na ka sboh kaba mih na ki jingri ki lah ban pyndonkam h a aba rep ia bun jait ki jingthung kiba kha pisa bad pynmyntoi shibun eh ia ki nongrep. Ki nongri jingri ki donkam ban ri ia bun jait ki jingri khnang ba kawei pa kawei ka jait jingri kan kyrshan bad pyn myntoi ha bun ki liang ia ka iing ka sem jong ki nongri jingri. Kane kan pynlong ia ki briew ba kin ieit bad man roi ha ki kam ri jingri, thung jingthung bad ha ka rep kaba long kawei na ki projek kaba kamai spah buk buk eh ha kine ki sngi. Ka shong shibun ha ki nongrep ban pyniar ia ka kam ri jingri, thung jingthung bad kam rep, ba kan long ka projek kaba ai jingmyntoi ia ki nongri jingri, ka distrik bad ka jylla.
Na ka liang u General Secretary ka MVSA, Ri Bhoi , ha ka jingpynmih khubor u la iathuh ba ha kane ka jingrakhe ki la wan ia shim bynta da ki bun spah ngut ki nongrep bad ki nongri jingri, ha kaba ka MVSA ka la ai jingsumar bad sam dawai ei sha ki hajar ki jingri ha kane ka sngi, kaba la long shisha ka jingkyrkhu ia ki nongrep.
Kiwei pat kiba la ia shim bynta ha ki jingkren ki kynthup ia i Dr. (Kong) S.M. Kharbudon, Manager Zonal Deed Mill Umsning, u Bah E. Kharbani, Rangbah Shnong ka Lumnongrim , u Dr.E.R. Ksih, Deputy Director, Pig Farm, Kyrdem Kulai bad kiwei de.
Ki nongshong shnong ki dei ban tip ia ki hok lajong : MLSA
** Ki nongshong shnong ki dei ban tip ia la ki hok la jong ba kin ioh ia ki bai buria ia ki jinglut jingsep, ki bai dawai bad kiwei haba jia ki jing aksiden ha ki jingtrei kam lane leit jingleit, ong ki heh ka Meghalaya Legal Service Authority (MLSA) ha ka Legal Literacy Campaign kaba la long dang shen ha ka shnong Byrni, distrik Ri Bhoi.
Ka ophis Industries bad Labour, ha ryngkat ka ophis u Deputy Commissioner ka distrik Ri Bhoi bad ka MLSA ki la pynlong ia ka jingialang ai jingpynshai halor ki hok jong ki nong bylla ha ka iingophis ka MIDC ha Byrnihat.
Ha kaba kren kum u Kongsan, u Additional Advocate General u SP Mahanta, u la ong ba ka long kaba donkam eh ia ki paid nongshong shnong ba kin tip ia ki hok lajong, ba kynthup ruh ia ki nongbylla kiba don la ki jong ki hok kaba ki dei ban ioh kum ka bai bylla, ki bailut bai sep, ki bai dawai bad kiwei haba jia kino kino ki jingaksiden haba ki leit jingleit lane ha ki jing trei kam. Kam don satia ka jingiapher hapdeng ki shynrang bad ki kynthei ban ioh ia ki bai nong ha ki jingia trei ia ki kam bylla, u la ong.
U Mahanta u la ai ruh ia ka jingpynshai ba ki nongbylla kim dei da lei lei ruh ban duh ia ki bai bylla ba ki la trei shitom bad lada ki ia kynduh ia kano kano ka jing eh kaba dei ia ki jingsiew pisa la ha kano kano ka bynta ki dei ban mih sha khmat ba kin dawa ia la ki hok la jong. U la ong ba ka jingbuh ia ka life insurance ka long kaba donkam bha namar ka long ka jingiada ia baroh ki nong bylla. U la pynshai ruh ba ka jingpyntrei kam ia ki khynnah rit ka long kaba be-ain bad kaba la khang pyrshah.
Ha kane ka jingia lang ki nongkren ki la pynshai bniah bha ia ki jing donkam ka jingkynshew pisa ha ka provident fund, ka Employees Insurance, ka Medical benefits bad bun jait kiwei pat. Kiba la ia shim bynta ha ki jingiakren ki kynthup ia u ADC ka Ri Bhoi, i Labour Inspector i Kong G. Pakyntein, ka Deputy Labour Commissioner ka F.K. Marak, u Bah J. Dkhar, Manager DIC Nongpoh, ki paid nong bylla bad ki trai karkhana na kylleng kane ka thain.

Pynjulor ka eriong ia bun ki shnong ha West Khasi
** Bun ki shnong ha ka distrik West Khasi Hills ki la shah pynjulor ha ka eriong kaba la mih syndet syndet ha kane ka Sngi U Blei kaba la lah, ka 2 tarik mynta u bnai. Bun tylli ki iing ki la shah rah bad pyn lko pom, kynthup ruh ia ki dieng ki siej kiba don ki khlaw bad pynjot ruh ia ki jingthung jingtep kiba la sdang ban seisoh bad phuh syntiew. Ki shnong kiba la shah ktah eh ki kynthup ia ka Shahlang, Pyndengkirit, Lamumshing, Pomdikhar, Nongiadaw bad Nongkrong. Ki la iathuh ba kane ka eriong ka wan na sha ki thain Garo Hills bad ha ka jingiaid lynti jong ka ka la pynjulor ia bun tylli ki iing ki sem bad ki mar rep, ba kynthup ruh ia ki dieng ki siej. Kane ka thain ka kyntu ia ki bor sorkar ban ai jingiarap ia ki shem lanot kiba la duh noh ia ki iing ki sem jong ki.
Kohnguh KSU ki bos Pommura
** Da ki jingujor ki khynnah skul ka shnong Pommura, jan Mawryngkneng, distrik East Khasi Hills, ba ki bos kim treh kit ia ki khynnah skul na ka liang ka KSU Pommura Unit ka la shim khia bad leit ia kren ia ki draibar bos kiba kamai sha kane ka shnong. Ha ki jingiakren ki draibar bos ki la mynjur ban kit lem ia ki khynnah skul kane ka shnong. Ka KSU ka kyrpad ruh ia kiwei de ki bos kiba iaid lynti na ka shnong Pommura ba kin iarap kit lem ia ki khynnah skul ka Pommura. Ka KSU ka kyntu ia ki khynnah ban peit nombar ia ki bos kiba kyntait ban kit lem ia ki ha kano kano ka por ba ki leit skul ba ka seng kan leh da kaba tyngeh ia ki bos kiba kyntait ban kit ia ki khynnah skul. Ha ka permit jong ki bos la kdew shai kdar ba ki bos kin shakri ia ka leit ka wan ki paidbah shnong, bad lada kyntait ki la pynkhein ia ki ain ka permit, bad kim donhok ban dang kamai.
Leh be-ijot u hehspah Shillong
** Uwei u khun jong u heh spah na Shillong, u trai ka dukan Delhi Mistan na Khyndai Lad uba kyrteng u Kaliash Verma, uba trei ha Delhi bad uba kyrteng u Dushyant Verma u la leh be-ijot ia kawei ka samla kaba pule LLB Graduate ha katei ka nongbah. La ong ba kane ka samla ka dei na Shillong. Ki pulit ki la pynlong ka jingtohkit bniah ia u Dushyant na ka bynta ban lap ia ki jingdonkti jong u ha kiwei pat ki kam bat bor bad leh be-ijot ia ki samla kynthei, namar na ka laptop ba ki la ioh ban kurup na u, ki pulit ki la lap ia lai tylli ki phlim kiba u la ringdur ha ka por ba u leh ia kane ka kam pohjait bad batbor ia lai ngut kiwei pat ki kynthei.
Ai training dpei ding ha Mairang
** Ka Mairang Block Murtipurpose Farmers Federation ka la pynlong ka jingai jinghikai kaba kyrpang ba la tip kum ka Technology Training Camp (TTC) kaba 4 sngi lynter ha ka shnong Mawiong - Jadap kaba don hajan ka shnong Kynrut , kumba 30 km na ka shnong Mairang, distrik West Khasi Hills. Ha kane ka jingai jinghikai, ki paidbah nongrep ki la ioh ia ki jinghikai kumno ban shna ia ki dpei ding kiba duna jinglut bad ruh ban kynshew ia ka umslap ia kaba ki lah ban pyndonkam ha ki por tyrkhong um. Ia kane ka juh ka jingai jinghikai la pynlong ruh ha ka shnong Pyndengumiong, Mairang dang shen. Ha kane ka training la ai jinghikai da u Bah Daniel Rani nongialam jong katei ka seng ba ki paid nongrep kin tip ia ki buit stad saian ka juk mynta khnang ban pynduna noh ia ki jingpom pathar ia ki dieng bad ki jingpynjot kiba shyrkhei ia ka mariang kiba wanrah ia ki jingkyrduh um, ki jingtyrkhong slap bad ki jingshit kyrang kiba long ki daw kiba la pynmih ia ki jingpang kiba bun jait.
Aiwai iew Laitlyngkot u CEM
** U Bah Lambor Malngiang nongialam ka KHNAM ha KHADC u la kynnoh ba u Dr. Celestine Lyngdoh CEM ka KHADC u la donkti ha kaba aiwai ia ka iew Laitlyngkot sha uwei u riew shimet khlem ka jingmynjur ka EC bad ki MDC. Ka jingaiwai ka long ha ka dor T.40,000 shi snem, hynrei haba ia nujor ka dor ka la rit palat bad kum u Deputy CEM Trade um tip ei ei ia kane ka jingleh jong u CEM, ha ka por ba u thmu ban khot tender ia katei ka iew..

Jop mukotduma ka kurim ba dang 8 snem ka rta
** Ka khynnah kaba dang phra snem ka rta ha Saudi Arabia, kaba la shu pynshongkurim jubor bad u briew uba la 50 snem ka rta da u kpa jong ka hi, ka la jop ia ka mukotduma ban pyllait san shyieng bad une u kurim jong ka. Ka kmie jong kane ka khynnah ka la iathuh ba u nongbishar u kyntait arsien ia ka jingkyrpad jong ka ban shah ia ka khun jong ka ban ia khlad noh bad une u briew uba ka la shong kurim ha u Nailar mynshem snem. U nongiasaid ain jong kane ka khynnah, u Abdullah -al- Jeteli, u la iathuh ba une u briew u la mynjur ban iakhlad lok bad kane ka khynnah ha ka jingiapynbeit shabar ka iingbishar. Ym don ain ha Saudi Arabia kaba iadei bad ka rta ban shah shongkurim. Hynrei ka kynthei ka don pat ia ka hok ban rai la ka mynjur ne em.
Hukum dih sikret ka China
** Ki heh sorkar ka ri China ki la ioh ia ka hukum ba ki dei ban dih duma kumba shiteng million paket u sikret ba la pynmih bad shna da ki trai shnong kane ka ri, bad ia ki bym leh kumta yn dain kuna. Ka sorkar jong ka jylla Hubei ka la hukum ia baroh ki nongtrei sorkar ba kin pynlut lut ia u sikret ha ki 230,000 poket ba la shna da kane ka jylla ha kane ka snem, ong ka kot khubor Global Times. Ki tnad sorkar ki bym lah ban pynlut ia ka jingmang ba la ai ha ki ba kin dih ia une u sikret, kin shah dain kuna.”Kane ka jingbuh kyndon ka long ban kyntiew ia ka ioh ka kot lyngba ka khajna u sikret,” ong u Chen Mian Zu, u dkhot jong ka kompeni Gongan Cigarette, kaba die ruh ka bor kaba pyniaid iew ia une u sikret. Kumba 350 million ngut ki iap ha China na u sikret.